Поради климатските промени, екстремните горештини и шумските пожари ќе станат почести, поинтензивни и подолги, што ќе го влоши квалитетот на воздухот и здравјето на луѓето, предупредија ОН.
Според новиот извештај на Светската метеоролошка организација, агенција на Обединетите нации, динамиката на меѓусебното зајакнување на загадувањето и затоплувањето на планетата ќе има последици врз климата, поради што ќе настрадаат милиони луѓе.
„Дури и со ниски емисии ќе имаме повеќе шумски пожари и позагадена атмосфера“
Годишниот билтен на ОН за квалитетот на воздухот и климата го нагласува влијанието на чадот од шумските пожари во 2021 година, откако, како и во 2020 година, топлината и сушата го влошија ширењето на шумските пожари во западна Северна Америка и Сибир, предизвикувајќи значително зголемување на нивото на ситни честички (PM 2,5). штетни за здравјето.
„Според проекциите, дури и при слаба емисија, затоплувањето на планетата ќе предизвика зголемување на бројот на шумски пожари и загадување на атмосферата што тие ги предизвикуваат“, објасни генералниот секретар на Светската метеоролошка организација Петри Таалас.
Тој во соопштението нагласи дека оваа појава ќе влијае на здравјето на луѓето, но ќе влијае и на екосистемите бидејќи атмосферските загадувачи паѓаат на површината на Земјата.
„Го набљудувавме овој процес за време на екстремните горештини што ги погодија Европа и Кина оваа година, кога стабилните атмосферски услови, сончево време и слабите ветрови фаворизираа зголемени нивоа на загадувачи“, рече тој.
Што е со шумските пожари?
Според набљудувањата на планетарно ниво, во текот на изминатите две децении, вкупната изгорена површина за една година има тенденција да се намалува, благодарение на помалку пожари во саваната и преријата. Но, на континентално ниво, зголемена тенденција е забележана во некои региони, особено во западниот дел на Северна Америка, во Амазон и Австралија.
Тешките шумски пожари предизвикаа ненормално покачени нивоа на честичките ПМ 2,5 во Сибир, Канада и западниот дел на САД во јули 2021 година. Во источен Сибир овие концентрации достигнаа нивоа што „никогаш не биле забележани“, според Светската метеоролошка организација, главно поради особено високите температури и сушата.
„Оваа година дава навестување за тоа што носи иднината“
Оваа година „дава навестување за тоа што ни носи иднината бидејќи мораме да се плашиме од ново зголемување на фреквенцијата, јачината и времетраењето на топлотните бранови“, тврди Таалас.
Ова може уште повеќе да го влоши квалитетот на воздухот поради таканаречената „климатска реакција“, односно влијанието на климатските промени врз зголемувањето на нивото на озон на ниво на земјата, на штета на воздухот што го дишеме.
Според проекциите, речиси четвртина од светската популација живее во областите каде повеќе ќе се почувствува оваа појава, а тоа е поголем дел од Азија, објасни Лоренцо Лабрадор, одговорен за научни истражувања во Светската метеоролошка организација. Според тоа, климатските промени би можеле да им наштетат на стотици милиони луѓе.
