Во јули 2022 година, жените имале 32,7% од сите мандати во националните парламенти на Европската Унија, додека во светот просекот бил 26,4%, покажуваат објавените податоци од статистичката агенција Еуростат, по повод Меѓународниот ден на жената.
Во Европскиот парламент жените се исто така сè уште малцинство, но ги има пропорционално повеќе отколку во националните парламенти на земјите-членки на ЕУ.
Од формирањето на тоа тело во 1952 година до првите непосредни избори во 1979 година пратенички мандати имале само 31 жена, иако тогаш бројот на пратеници бил многу помал.
По првите непосредни избори процентот на жени беше 15,2%, а денес сочинуваат 39,3% од вкупно 705 пратеници.
Во националните парламенти на сите европски земји овој просек во февруари годинава изнесува 31,1%, покажуваат редовните месечни податоци на Интерпарламентарната унија (ИПУ).
Во светот, жените го сочинуваат мнозинството во парламентот само во три земји, и тоа во Руанда (61,3%), Куба (53,4%) и Никарагва (51,7%).
Мексико и Обединетите Арапски Емирати имаат еднаков број мажи и жени во нивните парламенти.
Од друга страна, постојат три земји во целиот свет чии парламенти немаат ниту една жена, а тоа се островските држави во Океанија, Папуа Нова Гвинеја и Вануату, и Јемен на Арапскиот Полуостров.
Во долниот претставнички дом на оманскиот парламент има само две жени меѓу 85-те пратеници, а во кувајтскиот парламент жените имаат 4 од вкупно 60 мандати.
Во регионот на Западен Балкан, во однос на пропорционалното учество на жените во националните парламенти предводат Северна Македонија со 42,5% и Албанија со 35,71%, покажуваат податоците на ИПУ.