Италијанскиот репрезентативец за само 48 часа се договорил со Арсенал откако во Челси му рекле дека повеќе не е во нивните планови.
Говорејќи за DAZN, играчот од средниот ред на „Топчиите“ зборуваше за тоа како на последниот ден од зимскиот преоден рок од Челси се пресели во градскиот ривал Арсенал.
Тој потврди дека клучниот фактор за овој трансфер направен 6 месеци пред да му истече договорот со „Сините“ бил стратегот на Арсенал, Микел Артета.
„Тој дефинитивно беше една од причините. Ми се јави и сѐ се одвиваше многу брзо, договорот го склучивме за помалку од 48 часа. Разговарав со Челси и знаев дека не сум им повеќе во плановите. Сакав да напредувам во кариерата, а проектот на Арсенал ми одговараше“, објаснува Жоржињо.
„Се работи за млад тим кој игра добар фудбал и се вклопува во моите карактеристики. Го разгледав секое можно сценарио и донесов одлука. Понекогаш треба човек да прифати дека не е повеќе дел од проктот и дека на некои работи им доаѓа крајот“.
Жоржињо направи паметен потег со оглед на тоа што Челси се дави во лоши резултати и е далеку од врвот, доека неговиот нов клуб е на врвот во Премиер лигата и се бори за титулата. Арсенал има два бода предност пред бранителот Манчестер Сити од кого неодамна загуби во меѓусебната пресметка со 3:1.
„Го натеравме Сити да игра на долги топки, малку тимови можат тоа да го направат. Одигравме добро. Разочарани бевме од резултатот и од некои грешки, но останавме смирени бидејќи знаевме дека имавме и многу позитиви. Ако не веруваме во титулата сега, тогаш кога?“, заклучи Бразилецот со италијански корени.
Жоржињо постигна 29 гола на 213 натпревари за Челси. Во Арсенал дојде за 13,5 милиони евра и потпиша до јуни 2024 година.