Во тек е потрагата по актер кој ќе го замени Даниел Крег во улогата на Џејмс Бонд, а меѓу фаворитите е и Хенри Кавил, кој веќе се натпреваруваше за истата улога во филмот Casino Royale во 2006 година.
Улогата потоа му припадна на Крег, а Кавил со години беше убеден дека не ја добива поради неговата лоша физичка состојба, но режисерот Мартин Кембел во едно неодамнешно интервју ја откри вистинската причина за тоа.
„Тој беше одличен на аудицијата. Одлично се однесуваше... Изгледаше одлично, беше во одлична физичка форма... Многу убав, многу извајан. Сепак, тој беше малку премлад во тоа време", изјави Кембел.
Изгледа дека годините може повторно да играат улога во трката за Џејмс Бонд. Кавил моментално има 40 години, а поради долгиот ангажман што го бара оваа улога, продуцентите Барбара Броколи и Мајкл Г. Вилсон бараат актери кои се во средината на триесеттите, пишува ScreenRant. Покрај Кавил, кандидати за улогата се и Арон Тејлор-Џонсон, Реге-Жан Пејџ, Ричард Маден, Том Хидлстон и Том Харди.
На Кавил не му помага ниту тоа што би бил премногу совршен Бонд, бидејќи ги има сите карактеристики на класичниот приказ на тој лик. Имено, продуцентите изјавиле дека овојпат сакаат да направат нова верзија на Бонд, која досега не е видена, поради што би можеле да размислуваат надвор од рамката при изборот на актер. И покрај ова, Кавил и понатаму е миленик на фановите за улогата на најпознатиот британски шпион.
