Група руски лекари го повикаа рускиот претседател Владимир Путин да престане да го мачи затворениот критичар на Кремљ, Алексеј Навални, кој рече дека новогодишната ноќ ја поминал во дисциплинска ќелија бидејќи утрото се измил половина час порано отколку што требало.
Во писмото, потпишано од 170 претставници на руската медицинска заедница и објавено на руската независна веб-страница Медуза, се бара да се стави крај на злоупотребата на Навални во затвор.
„Не можеме и немаме право мирно да гледаме дека намерно се повредува здравјето на политичарот Алексеј Навални, кој се наоѓа во поправната колонија број шест на Федералната затворска служба во Владимирската област.
Од медицинска гледна точка, очигледно е дека Навални не добива доволно медицинска помош. Неговата здравствена состојба се влошува бидејќи престојува во дисциплинската ќелија“, пишуваат во писмото руските лекари.
Во серијата твитови објавени вчера од неговиот адвокат, Навални рече дека руските затворски власти го испратиле во самица по 10-ти пат откако почнал да ја отслужува казната во затворот со максимална безбедност ИК-6 во Владимирската област во Русија.
Неговиот адвокат Вадим Кобзев вели дека Навални моментално боледува од висока температура, треска и кашлица. Адвокатот тврди дека тоа е резултат на неговото престојување во иста ќелија со затвореник со лоша хигиена и тешки симптоми на грип.
