Во текот на XIX век во Индија била откриена тркалезна сфера со дијаметар од 15 см, во чиј центар се наоѓал агат. Кратко потоа била категоризирана и поднесена во Природонаучниот музеј на Обединетото Кралство. Сè додека, во 2018 година, истиот агат не бил изложен - кога го привлекол вниманието на кустосот, Робин Хансен.
Имено, првото нешто што му паднало в очи била речиси совршената сферична форма на карпата, а потоа и тенкиот слој околу кристалот кој сугерирал дека се работи за фосилизирано јајце од диносаурус.
Јајце од титаносаурус - најголемиот диносаурус што некогаш одел на Земјата
Веднаш штом го зел в раце и подетално го анализирал, Хансен сфатил дека е многу слично на јајцата на титаносаурусите, кои се пронајдени во Кина и Аргентина. Покрај тоа, многу голем број од овие диносауруси живееле во Индија за време на доцниот креда, а во прилог на тоа говори и откривањето на голем број нивни гнезда.
„Колку што знаеме, фауната на диносаурусите во Индија за време на кредата била многубројна, иако не била особено разновидна“, вели палеобиологот Пол Барет од Природонаучниот музеј. И додаде дека овие џинови, високи 37,5 метри и тешки 70 тони, имале слични репродуктивни навики како модерните желки и крокодили, т.е. ја усвоиле стратегијата да снесат помали јајца во поголем број, а потоа да ги покриваат со вегетација.
Претпоставката е дека тоа се случило и во овој случај, со тоа што областа каде што е откриено јајцето е богата со вулкани. Поради тоа, постои сомневање дека течењето на лавата го уништило гнездото, што дополнително помогнало да се зачува јајцето и да се уништи ембрионот. Но, кога водата богата со силициум во еден момент очигледно навлегла во неговата внатрешност, се формирал бело-розовиот минерален агат.
