Говорот на омраза насочен кон припадниците на ЛГБТИ заедницата се зголеми во Европа и Централна Азија за време на пандемијата на коронавирус.
Вербалните напади на политичките лидери врз припадниците на ЛГБТИ заедницата (лезбејки, хомосексуалци, бисексуалци, трансродови и интерсексуалци) растат во Хрватска, Босна и Херцеговина, Бугарија, Чешка, Финска, Унгарија, Италија, Полска, Русија, Словачка и Турција, меѓу другите, во извештајот на мрежата ILGA-Europe што обединува 600 организации и опфаќа 54 земји.
Верските лидери во Белорусија, Грција, Словачка, Турција и Украина шират говор на омраза, а многу од нив ги обвинија ЛГБТИ луѓето за ширење на коронавирусот, соопшти мрежата.
Говорот на омраза се прошири на социјалните мрежи во Хрватска, Белгија, Бугарија, Чешка, Малта, Црна Гора, Русија и Турција, но и во медиумите во Словенија и Украина.
Извештајот, исто така, покажува зголемен отпор кон правата на трансродовите луѓе во Европа. Тој предупредува на падови во Хрватска, Австрија, Финска, Унгарија, Русија, Словачка, Словенија и Велика Британија и на „стагнација“ во Германија, Андора, Кипар, Чешка, Грузија, Косово, Црна Гора, Северна Македонија и Шведска.
Во делот за Јавно мислење и ставови во извештајот за Северна Македонија стои дека истражувањето на Субверзивен фронт спроведено со 325 јавни службеници покажало дека 36% од испитаниците сметаат дека ЛГБТИ луѓето сакаат „специјални права“.
Во истражување на Институтот за човекови права, спроведено во октомври, 76% од граѓаните на Република Северна Македонија рекле дека никогаш не запознале ЛГБТИ лице, две третини рекле дека не сакаат да имаат ЛГБТИ лице за колега, две третини не сакале да гледаат истополови двојки како се држат за рака во јавност.
„Властите и одговорните ја користеа ЛГБТИ заедницата како жртвено јагне“, рече Евелин Паради, извршна директорка на ILGA за Европа.
Невладината организација посочува дека годината генерално била обележана со репресивни мерки против демократијата и граѓанското општество, не само во Полска и Унгарија, две земји кои се на мета на Брисел за непочитување на владеењето на правото.
Во Полска, во некои општини се прогласени зони без ЛГБТ идеологија. Во Унгарија, владата на Виктор Орбан го воведе во уставот традиционалното разбирање за семејството и полот, а всушност забрани и посвојување деца од истополови парови.
Сепак, во извештајот на ILGA-Europe се наведува дека е постигнат одреден напредок во правата на истополовите парови, наведувајќи го примерот на Црна Гора, која минатата година стана прва земја од Западен Балкан што воведе граѓанско партнерство и Србија, каде што владата објави предлог-закон за истополови граѓански заедници.