Британската пејачка Адел го обележа овогодишното доделување на Британските музички награди BRIT. Свеченоста се одржа во лондонската „О2 арена“.
Ова беше првото издание на Британските музички награди, кои се доделуваат од 1977 година, со кое се укинаа родовите поделби, па сега акцентот е на категориите Уметник на годината и Странски уметник на годината наместо претходните категории за машки и женски изведувач. На годинешното доделување доминираше Адел, која освои три награди. „Кралицата на BRIT“, како што ја нарече водителот Мо Гилиган, ги доби наградите за најдобар албум, за најдобар изведувач, како и песна на годината за „Easy on Me“.
„Би сакала да им ја посветам оваа награда на син ми и на Сајмон, татко му. Овој албум беше целото наше патување, не само мое“, рече Адел во солзи, мислејќи на нејзиниот поранешен сопруг Сајмон Конецки.
И покрај тоа што беше објавен во ноември, „30“ – четвртиот студиски албум на Адел - е најпродаваниот албум во Велика Британија за 2021 година, со повеќе од 600.000 примероци за само шест недели. Адел неодамна изјави дека го снимила албумот за да му го објасни разводот на син ѝ.
Адел за наградата за уметник на годината ги победи Литл Симз и Дејв, Ед Ширан и Сем Фендер. Меѓу другите победници беше рок групата „Волф Алис“, којашто ја освои наградата за најдобра група, а раперот Литл Симз е најдобар нов изведувач. Ед Ширан беше прогласен за текстописец на годината.
Американските пејачки Били Ајлиш и Оливија Родриго ги освоија наградите најдобар странски изведувач, односно најдобра странска песна, за „good 4 u“. Наградата за најдобра странска група ја освои американското ар-ен-би дуо „Силк соник“, коешто го сочинуваат пејачот Бруно Марс и раперот-пејач Андерсон Паак.
Сем Фендер ја освои наградата за алтернатив – рок, а Дејв за хип-хоп – грајм – рап. Пејачката Дуа Липа ја доби наградата за најдобра поп – ар-ен-би изведба, а Беки Хил ја доби наградата за најдобар денс изведба.