Арнолд Шварценегер не дозволува празниците да му пречат во вежбањето.
Седумдесет и петгодишниот легендарен бодибилдер кој стана актер и политичар, на Бадник тренираше во празничен џемпер. Утрото го искористи за да ги тренира бицепсите, трицепсите и рамената на свеж воздух.
„Не е важно дали е Бадник или не. Сè уште тренираме“, рече тој, а потоа на своите следбеници им ги честиташе Божиќ и празниците и им посаката среќна и здрава Нова година.
Во објавата ги повика следбениците да се пријават на неговата мејлинг листа и да добиваат насоки за вежбање во новата година.
Шварценегер цел живот тренира и внимава на исхраната. Кога наполнил 15 години, почнал да тренира со тегови, а за пет години се закити со титулата Мистер Универзум. Повеќето денови станува околу пет наутро за да се напие шолја кафе, а потоа вози велосипед до теретана каде одработува едночасовен тренинг. Тој призна дека е зависен од тренинзи и дека секој ден мора да го започнува со некоја форма на вежбање.
„Одлучив да се прилагодам на моите години. Моите тренинзи се различни и се фокусирани на тоа да останам фит и да избегнувам повреди. Тренингот е дел од мојот живот. Тоа никогаш нема да се промени. Додека не умрам, ќе вежбам и ќе се забавувам додека ги билдам мускулите во теретана“, изјави тој за Eat This.
