Американските разузнавачки служби не ја исклучуваат хипотезата дека се случил инцидент во кинеска лабораторија, како објаснување за почетокот на епидемијата на коронавирус во Вухан, Кина, соопштија вчера официјални претставници.
„Разузнавачката заедница не знае точно каде, кога и како вирусот првпат се пренел“, изјави директорката за разузнавање Аврил Хајнс пред Комитетот на Сенатот.
Таа зборуваше за две можни теории што може да го објаснат потеклото на коронавирусот: човечки контакт со заразени животни или лабораториски инцидент.
Таа додаде дека се работи на ова прашање и собирање информации за да се разјасни потеклото на пандемијата.
„Правиме сѐ што можеме и ги користиме сите ресурси со кои располагаме за да го расветлиме ова“, рече директорот на ЦИА, Вилијам Барнс.
„Но, она што за нас и нашите експерти е јасно е дека кинеските лидери не беа целосно искрени или транспарентни во соработката со Светската здравствена организација (СЗО)“, рече тој.
Во извештајот објавен кон крајот на март, експертите на СЗО ја оценија како „крајно малку веројатна“ теоријата дека вирусот излегол од Институтот за вирусологија во Вухан, градот каде што првпат се појави SARS-CoV-2 кон крајот на 2019 година.
Но, директорот на СЗО Тедрос Аданом Гебрејесус, побара истрагата за таа веројатност да се продолжи уште неколку дена. додавајќи дека меѓународните експерти му кажале колку е тешко да се дојде до податоци за посета на Кина.
Тезата дека вирусот излегол од лабораторијата ја поддржа и поранешниот американски претседател Доналд Трамп, додека Кина секогаш ја негирала можноста.
