Карим Бензема (35) го напушти Реал. Тој како 21-годишник во Мадрид пристигна во 2009 година од Лион за отштета од 35 милиони евра. За 14 сезони во Реал освои рекордни 25 трофеи со клубот (колку што има и Марсело), вклучувајќи по 5 во Лигата на шампионите и Светското клупско првенство…
Сѐ уште не е официјално потврдено каде францускиот напаѓач ќе ја продолжи кариерата по завршувањето на договорот со Реал, но речиси сигурно е дека тоа ќе биде Ал Итихад, кој му понуди 400 милиони евра за две сезони.
„Кој би одбил 400 милиони евра?“, наводно им кажал Бензема на соиграчите. Французинот со алжирско потекло во Реал имаше годишна бруто плата од 24 милиони евра.
Бензема постигна гол на неговиот последен натпревар во белиот дрес. Постигна гол од пенал во 72. минута против Атлетик, а веднаш потоа се пресели на клупата. Навивачите со овации го испратија од теренот.
По натпреварот тренерот Карло Анчелоти ја коментираше одлуката на Бензема да си замине.
„Изненаден сум… Тоа беше во последен момент. Вчера тренираше нормално и утрово ни кажа. Не можеме да бидеме среќни, но мора да ја почитуваме неговата одлука. Неговата одлука е дел од личен процес. Постигна неверојатни и незаборавни работи во Реал“, изјави Анчелоти и порача дека ќе остане тренер.
Во 14-те сезони во кралскиот дрес Бензема одигра 648 натпревари во сите натпреварувања и постигна 354 голови. Покрај трофеите во Лигата на шампионите и Светското клупско првенство, освои и 4 во Ла Лига, 3 во Копа дел Реј, 3 во шпанскиот Суперкуп и 4 во Суперкупот на УЕФА.