Со ребрендирање и целосна промена на деловната стратегија на модниот бренд на Victoria’s Secret, ќе се укинат славните „Ангели“ и ќе бидат заменети со „амбасадори“ кои нема да бидат бирани само врз основа на изгледот.
Со децении Victoria’s Secret ги збираше на едно место најубавите модели, жени кои беа заштитни лица на брендот и учествуваа на годишното модно шоу, носејќи ја титулата „Ангел“.
Сепак, како дел од новата стратегија, планирано е брендот за долна облека да се движи во многу посовремен правец - ангелите ќе бидат заменети со амбасадори воведени за да инспирираат промени и позитивност, а фокусот повеќе нема да биде само на физичкиот изглед.
Брендот исто така ќе започне серија нови хуманитарни партнерства за да помогне во поддршката на животот на жените ширум светот.
Овие нови амбасадори ќе формираат VS Collective кој ќе биде „растечка група успешни жени кои имаат заедничка страст да водат позитивни промени“.
Првите имиња на списокот вклучуваат модели како што се: Адут Акеч, Пријанка Чопра Џонас, Валентина Сампајо, Палома Елсесер, Меган Рапино, Ајлин Гу и Аманда де Каденет.
„Со VS Collective создаваме платформа што ќе гради нови, подлабоки односи со сите жени“, рече Марта Пис, главен директор за маркетинг во Victoria’s Secret.
„Преку низа соработки, деловни партнерства и иницијативи, внесуваме нови димензии на нашето искуство во брендот. Со комбинирање на енергијата, креативноста и перспективата на новите партнери со нашата мрежа, можеме да го трансформираме начинот на поврзување", рече Пис.
Брендот исто така ќе започне хуманитарен VS Global Fund за финансирање на иновативни истражувачки проекти насочени кон унапредување на терапијата против рак кај жени и инвестирање во следната генерација жени научници што ја претставуваат различната популација на која им служат, обезбедувајќи најмалку 5 милиони долари годишно за испитување и да се осврнат на расните и родовите прашања.
Овие најави поставуваат нова насока во која планира да оди брендот за долна облека, а кој долго време беше критикуван заради сексистичкиот и застарен пристап кон маркетингот.
„Ова е драматична промена за нашиот бренд и е промена што ја прифаќаме од нашата срж“, рече Мартин Вотерс, извршен директор, нагласувајќи дека ова е само почеток.
