Националното здружение на навивачите во Англија спроведе анкета меѓу тамошните навивачи и две третини од испитаниците наведоа дека се против ВАР технологијата во англискиот фудбал.
Дури 67,3% од навивачите навеле дека се против ВАР системот во Премиер лигата, а 79,1% од оние што редовно одат на натпревари навеле дека нивното искуство со ВАР е „лошо“ или „многу лошо“.
Зошто ова е важно? Резултатите од ова истражување се во тотална спротивност со истражувањето што ФА го спроведе меѓу навивачите во 2017 година, односно пред воведувањето на ВАР, кога 74,6% од нив беа за воведување на оваа технологија.
Истражувањето, како што наведуваат медиумите од Островот, го спровело Националното здружение на навивачи, а анкетирани биле 9.645 луѓе за време на месеците март и април.
Речиси 92% од испитаниците рекле дека донесувањето на судиските одлуки трае предолго, а само 26% он нив се задоволни со ВАР технологијата и ја поддржуваат нејзината употреба.
На крајот се додава дека само 5,5% од навивачите што одат на натпреварите го оцениле искуството со ВАР како „добро“ или „многу добро“, додека 65,4% од оние што натпреварите ги гледаат на ТВ искуството го оцениле како „лошо“ или „многу лошо“.