Аријан Адеми се прости од репрезентацијата на Македонија, соопшти селекторот Благоја Милевски.
Адеми (32) се повлекува од лични причини. За македонската репрезентација настапи 30 пати и постигна четири гола. Дебитираше во 2014 година, а круна на репрезентативната кариера е настапот на Европското првенство во 2021 година.
„Посебно жалам за отсуството на Аријан Адеми, кој поради лични причини реши да ја заврши репрезентативната кариера. Имав разговор со него, тој е категоричен во својата одлука. Ќе ни недостига како личност и фудбалер. Чувствуваше дека време беше да ги заврши настапите во репрезентацијата и дека повеќе нема да сметаме на него.
Треба да му се заблагодариме за придонесот за репрезентацијата и нашиот фудбал. Предложивме да организираме збогување на некој од следните натпревари. На него е да одлучи дали тоа ќе биде против Хрватска во јуни во Риека или на првиот домашен натпревар во Скопје“, изјави селекторот Милевски.