Спортскиот директор Кристиано Џунтоли (51) е еден од најзаслужните за шампионската титула на Наполи оваа сезона, прва по 1990 година и ерата на Диего Армандо Марадона. Џунтоли важи за фудбалска енциклопедија во Италија бидејќи ги знае карактеристиките на неверојатен број играчи, а благодарение на неговите квалитети Наполи донесе неколку фантастични играчи како Хвича Кварацхелија, Виктор Осимхен и Ким Мин-џе.
Сепак, Џунтоли по девет години ќе го напушти Наполи на крајот на сезонава. Тој веќе му ја соопштил својата одлука на шефот Аурелио Де Лаурентис, објаснувајќи дека му треба нов предизвик.
Новиот предизвик во кариерата на Џунтоли ќе биде Јувентус, најомразениот клуб во јужниот дел на Италија. Италијанските медиуми се сигурни дека Џунтоли многу брзо ќе ја преземе функцијата спортски директор на торинскиот клуб.
Според првите информации од Италија, Џунтоли не е воодушевен од актуелниот тренер Масимилиано Алегри, кој заработува околу 7 милиони евра годишно. Од друга страна, Алегри исто така не е ентузијаст за новиот спортски директор бидејќи со тоа би се намалил неговиот авторитет околу распоредот на играчкиот кадар, бидејќи Јувентус во моментов нема спортски директор.
Јувентус моментално е втор во Серија А и се бори за освојување на Лига Европа каде во полуфиналето ќе се соочи со Севиља.