Добитникот на Греми, Ашер, ќе го предводи настапот на полувремето на Супербоулот во Лас Вегас, Невада, соопштија Националната фудбалска лига (НФЛ), Apple Music и издавачката куќа Rock Nation во неделата.
Финалето во американски фудбал, 58. по ред, треба да се одржи на стадионот „Алиџант“ во Лас Вегас на 11 февруари 2024 година. Полувремето, исто како и натпреварот, е еден од најгледаните ТВ настани во САД.
„Ова е најголемата чест што животот може да ви ја даде, конечно да настапам на Супербоул. Едвај чекам да му донесам на светот шоу што не личи на ништо друго што досега сте виделе од мене“, рече аренби-пејачот.
Од издавањето на својот деби-албум во 1994 година, Ашер Рејмонд IV продаде над 80 милиони плочи во светот, се искачи на врвот на музичките топ-листи и освои 8 награди Греми, кои според многумина се најпрестижните награди во музичката индустрија.
Магазинот Billboard го круниса како втор најуспешен уметник во 2000 години.
„U Got It Bad“, „OMG“ и „Yeah!“ се меѓу најголемите хитови на 44-годишниот пејач. Ашер моментно настапува во Лас Вегас како дел од неговата резиденцијална турнеја „Usher: My Way“.
„Ашер е икона, чија музика остави неизбришлива трага на културниот пејзаж во текот на својата кариера“, вели шефот на музика на НФЛ, Сет Дудовски, во соопшентието за јавност, објавувајќи ја одлуката.
Минатогодишното шоу на полувремето, кое го предводеше аренби-ѕвездата Ријана, беше најгледаниот настап на полувремето на сите времиња, соопштија организаторите.
Култни уметници и бендови, вклучувајќи ги „Ролинг стоунс“, Бијонсе, Стиви Вондер, Принс и Брус Спрингстин, се качија на сцената на полувремето на најпопуларниот спортски настан.
