Американскиот претседател Џо Бајден во интервју ја коментираше инвазијата на Руската Федерација на Украина и изјави дека Русија ќе се соочи со најсилните санкции во историјата, поради оваа војна.
Во текот на разговорот со новинарот Брајан Коен, Бајден изјави дека санкциите со кои Русија се соочила во минатото не можат да се споредат со санкциите кои следат сега.
„Сите досегашни санкции не се како овие. Сега имаме две опции, да почнеме трета светска војна, односно да влеземе во војна со Русија или да ја натераме Русија да ја плати економската цена за ова што го прави. Ниту една санкција не може да стапи на сила веднаш, но мислам дека овие санкции се најсилни во историјата“, изјави Бајден.
Тој смета дека Владимир Путин очекувал раздор во НАТО.
„Мојата цел од почетокот беше сите да бидеме на иста страна. Путин мислеше дека може да го раздвои НАТО, но тоа не се случи, станува збор за целосно единство. Русија ќе плати краткорочно и долгорочно висока цена за тоа што го прави“, вели Бајден.
Американскиот претседател порача доколку демократскиот свет се држи заедно, во светот ќе има многу помалку хаос.
„Не е само НАТО обединет, видете што се случува во Финска, Шведска и во другите земји. Путин го произведе спротивното од тоа што имаше намера да биде. Мора да го одржиме правецот со нашите сојузници. Во меѓувреме. Ќе продолжиме да испраќаме воена и финансиска помош на Украина“, изјави американскиот претседател.
Тој смета дека светот се наоѓа во клучен период.
„Секоја трета, четврта или петта генерација во светот чувствува фундаментални промени. Само за пример, во наредните десет години ќе видиме повеќе промени отколку што имаше во последните 50 години“, изјави тој.
