Американскиот претседател Џо Бајден изјави дека украинскиот претседател Володимир Зеленски не сакал да ги слушне американските предупредувања за можна инвазија од Русија.
„Многумина мислеа дека претерувам кога зборував за рускиот напад на Украина уште пред тој да почне“, изјави Бајден на прием во Лос Анџелес, на кој се собираа средства за Демократската партија.
Тој додаде:
„Но, знаев дека имаме информации во таа смисла, дека Владимир Путин ќе ја премине границата. Немаше сомнежи, но Зеленски не сакаше да ги слушне предупредувањата“, изјави Бајден пред новинарите.
САД почнаа да предупредуваат за подготовки за инвазија над Украина многу порано пред објавувањето на рускиот претседател дека на 24 февруари започнува „специјална операција“, пишува AFP.
Американските предупредувања предизвикаа неверица, па дури и критики кај некои европски сојузници, кои тогаш сметаа дека САД претеруваат.
