Стрелецот на израмнувачкиот гол синоќа против Финска смета дека репрезентацијата игра различно кога играчите имаат солидна минутажа во своите клубови.
Македонија синоќа одигра 1:1 против Финска на првата од двете пријателски, последни натпревари за годинава и воедно последни проверки пред стартот на ЕУРО 2024 квалификациите во март. Еден од играчите кои застанаа во микс зоната по натпреварот за да дадат изјави за медиумите беше и Енис Барди, кој синоќа после 6 натпревари по ред не ја носеше капитенската лента бидејќи во тимот се врати Стефан Ристовски.
„Сметам дека полека, но сигурно сите играчи се враќаме во форма. Навистина е добро што многумина од нас играме стандардно во нашите клубови и тоа е видливо и многу важно. Игра ни е многу поразлична кога играме стандардно во клубовите. Ова беше само еден тест за тоа што ни следи во март. Дај боже тогаш да бидеме во форма и да го дадеме максимумот за репрезентацијата“, задоволен беше Барди.
Се играше 74. минута кога Езѓан Алиоски беше во пробив по левата страна кога беше соборен во шестнаесетникот за пенал. Алиоски ја грабна топката решен да го изведе казнениот удар, но Барди дојде до него и му напомена дека тој е назначаен за изведувач на пенали, по што успешно го реализираше израмнувајќи на 1:1.
Барди во новава сезона има и нов клуб откако летоска од Леванте се пресели во Трабзонспор, кој е актуелен бранител на тронот во Турција.
„Нова средина, нова амбиент, нов клуб. Не ми требаше многу време за да се адаптирам и среќен сум што сум дел од таков клуб. Навистина ми беше сон да играм за тим кој што се бори за титула и игра на европска сцена“, заврши македонскиот заменик-капитен.