Интер Мајами, клубот на Дејвид Бекам, се подготвува за новата сезона во МЛС.
Бекам го назначи поранешниот соиграч Фил Невил за тренер, а во пресрет на почетокот на сезоната даде интервју во кое зборуваше за можното доаѓање на мегаѕвзезди како Лионел Меси и Кристијано Роналдо во МЛС.
„Кога влеговме во оваа приказна со Интер во МЛС, секогаш се зборуваше за потенцијално доаѓање на големите играчи откако ќе ја завршат кариерата во Европа. За тоа секогаш ќе се зборува и искрено сметам дека тоа нема да биде тешка одлука за нив. Мајами е одлично место за живеење, одличен град и нашиот клуб има многу фанови. Базата на домашни играчи е добра и мислам дека Мајами е многу привлечен за ѕвездите од Европа", рече Бекам.
Меси и Роналдо сѐ почесто се спомнуваат за можна преселба во САД, исто како што Бекам пристигна во Лос Анџелес Галакси во 2007 година. Во тоа време не беше познато, но по неговото пристигнување во МЛС, Бекам се договори со лигата за ексклузивен попуст при купување на франшизата доколку се реши на тој чекор, што на крајот и го постигна.
