Седми ден по ред повеќе десетици илјади демонстранти учествуваа во протестите против резултатите од претседателските избори во Белорусија. Синоќешните протести беа најмасовни.
На улиците немаше видливо присуство на полицијата, а Reuters процени дека во денот кога Русија прифати да даде поддршка на Белорусија во случај на воена закана од странство, на протестите се собраа околу 200.000 луѓе.
И додека од една страна протестираа луѓето против Лукашенко, во центарот на Минск беше одржан контра-митинг за поддршка на белорускиот претседател.
Лукашенко одржа говор пред помал број луѓе, барајќи да се одбрани независноста на Белорусија. Тој истакна дека повторувањето на изборите би значело смрт за Белорусија како држава.
„Раководството на НАТО бара од нас да одржиме нови избори. Доколку им ја исполниме желбата тоа би било смрт за нашата држава“, изјави Лукашенко.
Поддршка демонстрантите добија од Полска и Чешка, каде се одржаа масовни собири на кои беше поставено белоруското знаме. Луѓето носеа знамиња, транспаренти со слогани како „Слободна Белорусија“ или портрети од Светлана Тихановскаја, ривалката на Лукашенко.
Францускиот претседател Емануел Макрон ијзави дека Европската Унија би требало да ги поддржи демонстрантите во Белорусија.
