Поранешниот италијански премиер Силвио Берлускони е во болница од понеделникот и нема да може да присуствува на јавни настани некое време, објавија денеска италијанските медиуми.
Сè уште е нејасно зошто 84-годишниот медиумски тајкун е хоспитализиран, но еден од лидерите на неговата партија Форца Италија за AFP потврди дека Берлускони е во болница на прегледи и дека „не е ништо сериозно“.
Берлускони не можеше да присуствува на судското рочиште утрово во Милано, пренесува Reuters.
Силвио Берлускони веќе беше хоспитализиран во септември поради инфекција на белите дробови предизвикана од COVID-19, а потоа помина неколку дена во центарот за кардиоваскуларни болести во Монако поради срцева аритмија, и имаше операции во 2019 и 2016 година поради проблеми со срцето.
Неговите адвокати не побараа одложување на новото рочиште на судењето за Руби-Тер закажано за денеска, а станува збор за скандалот „Рубигејт“ и познатите вечери „бунга-бунга“ организирани од Силвио Берлускони за млади жени во неговата луксузна вила во близина на Милано, кои богато ги наградувал.
Во аферата, Берлускони и уште 28 други беа гонети за лажно сведочење и давање мито на сведоци.
Процесот Руби-Тер генерално се однесува на сумите пари кои Берлускони им ги исплаќал на млади жени и музичари кои присуствувале на „бунга-бунга“ забавите, во замена за нивното молчење.
Според обвинителството, за молчење Берлускони платил десет милиони евра од 2011 до 2015 година, од кои седум милиони само на Руби, девојка која била малолетна кога учествувала на тие забави.
