Фудбалерите на Бразил синоќа со петарда против Боливија (5:1) успешно ги започнаа квалификациите за Мундијалот 2026.
Натпреварот против Боливија ќе остане врежан со златни букви во историјата на „Селесау“, откако Нејмар стана најдобар стрелец на оваа селекција на сите времиња.
Новопечениот играч на Ал Хилал заигра по повеќе од еден месец и со 2 гола влезе во аналите на бразилскиот фудбал.
Во 17. минута голманот на гостите, Гиљермо Вискара, го одбрани неговиот удар од 11 метри, но сепак до крајот успеа да да ја затресе боливиската мрежа.
Голот во средината на вториот дел беше негов 78-ми во низа за националниот тим, со што го престигна легендарниот Пеле на вечната листа, а подоцна додаде уште еден во судиското надополнување.
Покрај него два гола постигна и Родригу, а еден постигна и Рафиња. Многу убав утешен гол за гостите, и тоа на каков начин, постигна Виктор Абрего.
Бразил за три дена ќе му гостува на Перу во 2. коло од јужноамериканските квалификации, натпревар закажан за среда рано утрината во 4:00 часот по македонско време.
Во вториот натпревар од програмата ноќеска, Уругвај му одржа лекција на Чиле совладувајќи го со 3:1. Николас де ла Крус постигна два гола (38. и 71. минута), а Феде Валверде еден гол (45.+2) за домашниот тим, додека Артуро Видал во 74. минута постигна утешителен гол за гостите.
Уругвај во вторник од 23 часот гостува кај Еквадор.
Ден претходно се одиграа првите три натпревари од вовбедното коло во кое победи славеа Аргентина и Колумбија.