Повеќе од 18 милиони луѓе, трипати повеќе од официјалните проценки, најверојатно починале како последица на коронавирусот ширум светот, објавија во Lancet американските научници минатата недела, две години откако Светската здравствена организација прогласи пандемија.
Наместо официјалната проценка според која во светот како последица од COVID-19 досега починале 5,9 милиони луѓе, пореално е дека од оваа болест досега починале 18,2 милиони, пренсува Lancet.
Тим експерти кои го следеа прекумерниот број на смртни случаи од COVID-19 на Американскиот универзитет Вашингтон во Сиетл, ја проучуваа ситуацијата во 191 земја и територии во обид да го утврдат „вистинскиот глобален број на смртни случаи“.
Тие забележуваат дека некои смртни случаи се должат на зараза со вирусот, додека други се поврзани со инфекција со коронавирус. Тие објаснија дека инфекцијата со коронавирус може да ги влоши другите постојни здравствени состојби, како што се болести на срцето или белите дробови.
При пресметувањето на овие податоци, тие користеле детерминанта наречена вишок смртност и овозможува да се процени колку повеќе смртни случаи од очекуваниот број имало во споредба со претходните години.
Експертите собираа податоци преку пребарување на различни владини веб-страници, Светската база на податоци за смртност, базата на податоци за смртност на луѓе и Европската статистичка служба.
Тие открија дека вишокот на смртност варира значително во зависност од земјата или регионот, но вкупната глобална стапка пресметана како дел од студијата беше 120 смртни случаи на 100.000 луѓе.
Студијата покажа највисока стапка на смртност во земјите со пониски приходи, како што се Латинска Америка, Источна и Централна Европа и субсахарска Африка, но бројот на починати беше доста висок во некои земји со високи приходи, како што се Италија и делови од САД.
Научниците ги споредија податоците собрани помеѓу јануари 2020 и декември 2021 година, со податоците собрани во последните 11 години.
Во просек, на секои 100.000 луѓе во светот имало 120 смртни случаи кои не биле очекувани или предвидени без пандемијата на коронавирус, се вели во написот.
Според нивните проценки, најголем број смртни случаи, односно повеќе од очекуваното во нормални околности, е забележан во земјите на Андите во Латинска Америка (512 смртни случаи на 100.000), во Источна Европа (345 смртни случаи на 100.000), во Централна Европа (316 смртни случаи).
Во САД вишокот на смртност изнесуваше 179, а во Обединетото Кралство 127 луѓе на 100.000 жители.
Истражувачите, исто така, забележаа дека во некои земји, како што се Исланд, Сингапур и Австралија, имало помалку смртни случаи во тој период отколку што се очекувало во нормални околности.
Најголем број на смртни случаи поврзани со пандемијата има во Индија (4,1 милион), потоа САД и Русија (по 1,1 милион), Мексико (798.000), Бразил (792.000), Индонезија (736.000) и Пакистан (664.000).
„Понатамошните истражувања ќе ни помогнат да откриеме колку смртни случаи биле директно предизвикани од COVID-19, а колку индиректно предизвикани од пандемијата“, рече водачот на студијата Хаидонг Ванг од Универзитетот во Вашингтон во Сиетл.
Научниците предвидуваат дека прекумерната смртност поврзана со пандемијата ќе се намали во иднина, благодарение на вакцините и новите третмани, но предупредуваат дека пандемијата сè уште не е завршена и дека може да се појават нови, опасни варијанти на коронавирусот.
