Цените на нафтата на меѓународните пазари денеска се искачија до 89 долари, поддржани од растот на цените на дериватите во пресрет на намалената понуда од Русија и знаците за слабеење на новиот бран на инфекција со Ковид во Кина.
Цената на барелот на лондонскиот пазар по пладне беше повисока за 1,17 долари од вчерашното затворање и изнесуваше 88,64 долари. За исто толку поскапе и на американскиот пазар каде се тргуваше за 82,28 долари.
Трговците и понатаму се надеваат на брзо закрепнување на побарувачката во Кина по укинувањето на мерките за коронавирус, иако нивниот оптимизам накратко беше пригушен од новиот бран на ширење на вирусот. Во петокот тие беа охрабрени од падот од 72 отсто на бројот на критично болни пациенти во споредба со највисокото ниво за овој месец. Бројот на смртни случаи од Ковид во болниците е намален за 79 отсто.
Русија најави забрана
Кина е најголемиот увозник на нафта во светот, а олеснувањето на инфекцијата и постепеното нормализирање на животот би значело закрепнување на економијата и побарувачката за гориво. Трговците укажуваат на растот на цените на дизелот, керозинот и мазутот во очекување на намалена понуда од Русија откако Г7 и нејзините сојузници ги ограничија цените на почетокот на февруари.
Русија најави дека на почетокот на февруари ќе ја забрани нивната продажба на пет месеци на сите земји кои воведуваат ценовно ограничување.
„Сметаме дека цената на нафтата порасна пред се поради наглиот раст на цените на нафтените деривати“, пишуваат аналитичарите на инвестициската банка JPMorgan, издвојувајќи го и одржувањето на рафинериите. Расположението го поддржа и фактот што годишната стапка на раст на американската економија во четвртиот квартал изнесуваше 2,9 отсто, надминувајќи ги очекувањата.
Претставниците на Организацијата на земјите извознички на нафта (ОПЕК) и нејзините партнери ќе се состанат следната недела за да разговараат за производствената политика. Изворите во ОПЕК + не очекуваат никакви промени, наведува Ројтерс. Одделно, ОПЕК денеска објави дека цената на барел нафтена кошница на нејзините членки е речиси непроменета во четвртокот на 84,47 долари.
