Цените на нафтата на глобалните пазари останаа речиси непроменети минатата недела бидејќи се поддржани од најавата на Русија за намалување на извозот, додека, од друга страна, се притиснати од забавувањето на светскиот економски раст.
Цената на барелот на лондонскиот пазар минатата недела се зголеми за 16 центи, на 83,16 долари, додека на американскиот пазар цената на барелот се намали за 2 центи, на 76,32 долари.
Цените беа поткрепени со веста дека во март Русија ќе го намали извозот од западните пристаништа и до 25 отсто, што би го надминало претходно најавеното намалување на производството за 500.000 барели дневно. Од друга страна, цените се под притисок бидејќи растот на најголемите светски економии забавува, имајќи предвид дека централните банки веќе подолго време ги зголемуваат каматните стапки за да ја ограничат инфлацијата.
А забавувањето на економскиот раст доведува до зголемување на залихите. Така, беше објавено дека резервите на сурова нафта во САД минатата недела пораснале за дури 7,6 милиони барели, на највисоко ниво од мај 2021 година.
Залихите постојано се зголемуваат од средината на декември, што укажува на слабеење на побарувачката. И тој тренд најверојатно ќе продолжи бидејќи станува се појасно дека Американската централна банка ќе продолжи да ги зголемува каматните стапки, имајќи предвид дека инфлацијата и понатаму е висока.
Така, сега се проценува дека ФЕД ќе ги зголеми каматните стапки уште најмалку два или три пати, до јули до 5,35 отсто, а цената би останала на овие нивоа до следната година. Во поново време, инвеститорите се надеваа дека основната каматна стапка на ФЕД може да остане под нивото од 5 проценти и дека ФЕД ќе започне циклус на намалување на стапката на крајот на годината.
И сето тоа го поддржува растот на курсот на доларот, што исто така негативно влијае на побарувачката на нафта бидејќи ја намалува куповната моќ на купувачите со други валути. Поради сето ова, цената на нафтата падна во првите два месеци од годинава. Во моментов цената на барелот на лондонскиот пазар е во минус од почетокот на годината за околу 3,2 отсто, а на американскиот пазар за околу 5 отсто.