Јаков Милатовиќ, кандидатот за претседател на Движењето Европа Сега (ПЕС) победи убедливо во вториот круг од претседателските избори во Црна Гора, покажуваат првичните резултати.
Досегашниот претседател Мило Ѓукановиќ, кој ја извршуваше функцијата 30 години, е поразен со освоени 39,9 отсто од гласовите, додека Милатовиќ освоил 60,1 отсто, покажуваат прелиминарните резултати врз основа на 92,5 отсто од обработениот примерок, податоци на Центарот за мониторинг и истражување (ЦЕМИ).
Црногорските медиуми јавуваат дека веќе се слави победата на Милатовиќ.
Милатовиќ е роден во Подгорица на 7 декември 1986 година. Оженет е со Милена и има три деца, ќерките Сара и Ана, и синот Давид.
Милатовиќ беше избран за кандидат на ПЕС за претседател на Црна Гора на крајот на февруари годинава. По објавувањето на резултатите, тој рече дека на 2 април ќе го испрати Ѓукановиќ во политичка пензија. Во текот на кампањата најави сака да биде човекот кој ќе ја внесе Црна Гора во Европската Унија.
По победата во Црна Гора пред граѓаните се обрати новиот претседател на Црна Гора, Јаков Милатовиќ.
„Вечерва е ноќта што ја чекавме повеќе од 30 години и на сите да ни биде благословена оваа победа. Ова е победа на помирена Црна Гора. Црна Гора вечерва одлучи решително да се збогува со овој застарен режим на Ѓукановиќ и кажа „Да“ за европска Црна Гора“, рече тој.
„Мило, крадец“, извикуваа штабот на новиот претседател Милатовиќ, пренесуваат локалните медиуми.
„Вечерва овде можете да ја видите силата на заедничката Црна Гора, ова е заедничка, историска победа“, продолжи тој.
„Вечерва заедно со сите граѓани им кажавме збогум на корупцијата и криминалот. Никогаш повеќе. Рековме добра вечер на побогата, успешна, европска Црна Гора. Вечерва сакам да кажам дека срцето ми е големо затоа што добив толкава доверба од граѓаните. Ветувам дека навистина ќе бидам претседател на сите граѓани на Црна Гора. Никогаш повеќе нема да не поделат, осиромашуваат, Црна Гора се движи кон земја на правда, доверба, заедништво, европска Црна Гора. Во следните пет години ќе ја внесеме Црна Гора во Европската Унија, ветувам, никогаш повеќе да не војуваме од Црна Гора кон нашите соседи и земјите од Западен Балкан, сакаме европски Западен Балкан.
Се збогувавме со последниот диктатор во Европа. Затоа вечерва ќе им кажам благодарам на сите луѓе кои во изминатите 30 години го носеа факелот на слободата што блесна вечерва.
Црна Гора никогаш нема да ја водат неуспешни и недемократски луѓе“, порача Милатовиќ.