Чекирањето на аеродром може да биде исцрпувачко искуство од повеќе причини.
Од долги редици до проверка на багажот, ќе поминете низ цела голгота уште пред да пристигнете пред безбедносната проверка. Една компанија реши да го промени тоа со роботи.
Станува збор за првиот робот-асистент за check-in наречен Sara, кој е дизајниран да го подобри искуството на патниците на аеродромите.
Авиокомпанијата Emirates од Дубаи минатиот месец ја лансираше услугата City Check-in and Travel Store, преку која патниците можат да го букираат своето патување, да проверуваат летови, да купуваат неопходни работи за патување и да го пријават својот багаж помеѓу 24 и четири часа пред нивниот лет. На овој начин патниците заштедуваат време и порелаксирано пристигнуваат на аеродромите.
Патниците имаат две опции, да се чекираат на одредени киосци со човечки агент или да побараат помош од Sara.
Роботот е опремен со LCD екран чувствителен на допир. Овој робот може да го спореди лицето на патникот со фотографијата во неговиот пасош, да го пријави патникот и да му даде упатства за предавање на багажот.
Патниците можат од Sara да побараат совет и понуди за популарни дестинации, а консултантите за патувања потоа можат дополнително да помогнат во купување билети за идните патувања, да пружат помош при тековните резервации, избор на седишта, дополнителен багаж и слично.
Идните верзии на роботот ќе бидат уште понапредни и опремени со роботски раце за транспорт на багаж.
Emirates има намера да ја усвои и интегрира технологијата на вештачка интелигенција во своите услуги, а неодамна претседателот на компанијата, Тим Кларк, навести дека во авионите можно е наскоро да почнат да се користат копилоти со вештачка интелигенција.
