Мултимилионерот Ричард Бренсон доби дозвола да организира комерцијални патувања до работ на вселената со вселенско летало на неговата компанија Virgin Galactic, па сега сака и да го претрка ривалот Џеф Безос.
Досега компанијата на Бренсон имаше лиценца со која можеше да извршува само пробни летови.
Сепак, Федералната авијациска управа на САД денеска ѝ го даде на Virgin Galactic потребното одобрение за превоз на патници во вселената кои за тоа ќе ѝ платат на компанијата.
Околу 600 луѓе веќе уплатиле депозити на компанијата на британскиот претприемач и сите чекаат да летнат на надморска височина од 90 км, да доживеат бестежинска состојба и да ја видат закривеноста на Земјата.
Меѓу супербогатите патници има голем број филмски и музички ѕвезди. Virgin Galactic ќе ги испрати клиентите во вселената од наменскиот космодром во пустината во Ново Мексико.
Дозволата следеше по успешниот пробен лет на авионот Unity на 22 мај, кој ги исполнуваше сите технички услови според стандардите на Авијациската управа.
Компанијата го одреди распоредот на летови за оваа година и ќе продолжи да работи на подобрување на услугите што ќе им ги нуди на своите клиенти. На претстојниот лет на авионот Unity ќе има четири вработени во компанијата, додека Ричард Бренсон ќе патува во следната тура.
Во јавноста се шпекулираше дека можно е Бренсон да го премести летот за 4 јули, со цел да пристигне во вселената пред Џеф Безос, кој планира да го направи тоа на 20 јули, со летало на неговата компанија Blue Origin.
Сепак, како што рекоа за BBC од Virgin Galactic, времето на летот на Бренсон не е утврдено.