Можеби ќе имате право на дел од спогодбата од 725 милиони долари, или 660 милиони евра, кои Meta се согласи да ги плати во колективната тужба, пренесуваат светските медиуми.
Според Daily Mail, корисници кои ги исполнуваат условите се оние кои имале профил на Facebook од 24 мај 2007 до 22 декември 2022 година, а тие луѓе треба да аплицираат на ОВОЈ ЛИНК до 25 август 2023 година.
Во тужбата, во која Meta се изјасни дека нема вина, се наведува дека компанијата Facebook без дозвола објавила кориснички податоци и информации за пријателите на корисниците на трети лица.
Сето ова произлегува од скандалот Cambridge Analytica од 2018 година, кога беше откриено дека компанијата злоупотребила податоци од десетици милиони профили на Facebook дозволувајќи пристап до трети страни.
Cambridge Analytica претходно тврдеше дека собрала податоци само од околу 30 милиони профили на Facebook, но според новите информации се чини дека собрала лични податоци од дури 87 милиони корисници на Facebook.
„Во Facebook наводно знаеле за несоодветното собирање податоци на Cambridge Analytica од 2015 година и не презеле ништо да ја запрат активноста или да ги известат корисниците до март 2018 година“, соопштија тамошните власти.
Во тужбата се вели дека Facebook не ги заштитил соодветно корисничките содржини и информации од злоупотреба или неовластен пристап.
Ова им овозможи на апликациите на „трети страни“ да „соберат и продаваат пристап до приватните информации на корисниците на Facebook, вклучително и до фирмата за политички консултантски услуги Cambridge Analytica, без знаење или согласност на корисниците, се тврди во тужбата.
Федерален судија во Калифорнија одобри спогодба од 725 милиони долари со Meta во март.