Според статистичките податоци, појавата аквапланинг предизвикува десетици илјади сообраќајни несреќи годишно, често со човечки жртви.
Поројните дождови често резултираат со „реки“ по улиците и формирање на вирови што ја зголемуваат опасноста од лизгање и аквапланинг или хидропланинг.
Возачи, ова можеби ви се нема случено или ви се случило и сте реагирале правилно, но секогаш е добро да знаете како точно се случува оваа опасна појава, како да ја спречите и што да направите во таква ситуација.
При аквапланинг, гумите се лизгаат, не реагираат на управувањето со волан, на кочење или на забрзување. Може и да дојде до лизгање и извртување на возилото.
Аквапланинг (хидропланинг) е појава која се случува кога водата ќе се собере под гумата побрзо отколку што возилото со својата тежина може да ја истисне.Тогаш насобраната вода го подигнува автомобилот и тој плива на танок слој вода кој се формира измеѓу гумата и подлогата.
Добро познатата дизајнерска куќа Italdesign неодамна започна да се занимава со безбедност на сообраќајот. Во соработка со Bosch и Easyrain, Италијанците развиваат иновативен систем за контрола на лизгањето на влажни површини, што би можело да го испрати феноменот аквапланинг во минатото.
Инвентивниот систем Aquaplaning Intelligent System (AIS) дизајниран од Easyrain се состои од сензори и софтверско решение, кои се поврзани со систем дизајниран да препознае опасност од аквапланинг уште пред да се случи.
Системот работи така што кога ќе ја препознае потенцијалната опасност од аквапланинг, во дел од секундата ослободува млаз вода пред предните тркала, што помага да се „скрши“ водниот слој на површината и со тоа се спречува губење контакт на тркалата со асфалт.
Со оглед на тоа дека вишокот вода од подлогата веќе се отстранува со самото триење на гумите, млазот вода доаѓа како помошно средство и возачот може полесно да одржува контрола над возилото.
На видеото можете да го видите влијанието на ваквиот систем во случаи на аквапланинг:
Според извори на Easyrain, сè уште нема индикации кога овој систем би можело да почне да се инсталира во автомобилите, но тие потенцираа дека тој ќе биде компатибилен со сите видови автомобили, од оние од вообичаените класи, до автомобили со високи перформанси и електрични модели.
