Вчера Лајпциг го победи Штутгарт со 1:0 на гостувањето во рамките на 14. коло во Бундеслига.
Дани Олмо му донесе победа и скок на првото место на Лајпциг со погодокот во 67. минута. Шпанецот добро ја следеше акцијата на Лајпциг и ја смести топката во голот.
Лајпциг можеше да го реши натпреварот порано, но Емил Форсбериј промаши пенал во 22. минута. Односно, домашниот голман Грегор Кобел со неверојатна реакција го одбрани пеналот. Оваа одбрана веќе конкурира за најдобрата годинава, иако сме само на почетокот на 2021.
Швајцарецот се префрли на страна, а Форсбериј шутираше во средината на голот. Се чинеше дека Швеѓанецот сигурно ќе постигне гол, но Кобел, откако практично падна, ја крена десната нога и ја одби топката со врвот на копачката и го спаси својот гол.
Малку подоцна, Кобел одбрани уште една шанса, а Лајпциг имаше уште неколку одлични можности покрај голот на Олмо, но постигна само еден гол.
Лајпциг сега е водечки тим во Бундеслигата со бод повеќе од Баерн, кој вечерва од 18 часот го пречекува Мајнц.