Белгиецот од редовите на Манчестер Сити победи на гласањето во кое учествуваат и капитените на сите клубови.
Кевин Де Брујне е најдобар играч за изминатата сезона 2019/20 во Премиер лигата. Така покажаа конечните резултатите од гласањето во кое учествуваа капитените на сите 20 премиерлигаши, избрани фудбалски експерти, како и навивачите.
Белгискиот репрезентативец минатава сезона забележа 20 асистенции со што го израмни рекордот за најмногу асистенции во една сезона. Претходно тоа му успеа на Тјери Анри во дресот на Арсенал во сезоната 2002/03. Де Брујне постигна и 13 гола, создаде најмногу шанси и учествуваше во најмногу акции кои завршија со гол.
Најголема конкуренција според гласовите Де Брујне имал во Трент Александер-Арнолд, Џордан Хендерсон и Садио Мане од Ливерпул, голгетерите Дени Ингс од Саутемптон и Џејми Варди од Лестер, како и голманот Ник Поуп од Барнли.
