Интересно откритие осамна на социјалните мрежи по синоќешното финале на Копа Италија кое открива дека напаѓачот на Интер и натаму ја носи Рома во срцето.
Един Џеко сѐ уште во срцето го носи својот поранешне клуб Рома каде мина одлични 5 сезони. Интересен детаљ забележаа соколовите очи на некои навивачи и тоа во опремата која Босанецот синоќа ја носеше.
Имено, на една снимка кога Џеко лежи на тревата низ црната штуцна на едната нога се гледа дека носи коскобран со логото на Рома.
Ова не е прв пат Џеко да носи штуцни од својот поранешен клуб откако е во Интер. Тоа се случи и на декемврискиот натпревар кога Џеко во дресот на Интер се врати во Рим и играше против својата Рома (победи Интер со 3:0). Тогаш уште во соблекувалната се виде дека во опремата за натпреварот се и коскобраните од Рома.
Во жолтоцрвениот дрес на „Волчицата“ Џеко не успеа да освои ниту еден трофеј, но затоа уште во првата сезона со „Нераѕурите“ веќе освои два (домашните суперкуп и куп), а сѐ уште е во игра и за Скудетото.