Репрезентација на Босна и Херцеговина синоќа претрпе тежок и убедлив пораз од Португалија, која сосема заслужено победи со 5:0. Срамот можеше да биде многу поголем бидејќи тој резултат беше активен по само 45 минути.
Говорејќи за BHT1, капитенот Един Џеко го коментираше тешкиот пораз изјавувајќи дека дури и добро поминале со оглед на тоа што Португалија петте гола ги постигна во првото полувреме, па имаше уште 45 минути да ја продолжи голеадата, но не успеа.
„Дојдовме во таква ситуација што ни требаше победа вечерва против противник како Португалија. Натпреварот против Лихтенштајн нѐ измами. Кога ќе примите гол во 3. минута, нозете почнуваат да ви се тресат. Прелесно примивме голови поради индивидуални грешки. Не можеме повеќе вака. Како почна, на крајот добро заврши. Овој натпревар може да му помогне на селекторот да види што и како во иднина. Не е добро да се игра отворено против вакви тимови, едноставно не сме имк дораснати“, рече Џеко, на чие лице можеше да се види големо разочарување.
На Босна и Херцеговина синоќа ѝ требаше победа за да остане во игра за пласман на ЕУРО 2024, но наместо доа доживеа понижување пред сопствената публика. Сепак, Босанците преку Лигата на нации имаат обезбедено бараж, па така, пласман на завршницата во Германија ќе бараат во март идната година.
„Никогаш не е лесно кога се губи. Единствениот пат што ни остана е преку баражот. Во другите два натпревара треба да видиме на кого може да се смета. Претпоставувам дека во тој бараж сите ќе бидеме комплетни и ќе се обидеме да се квалификуваме на ЕУРО“, додаде Џеко.
До крајот на квалификациите Босна и Херцеговина има уште два натпревара. Прво на 16 ноември ќе му гостува на Луксембург, а три дена подоцна ќе ја нагости Словачка.
Инаку, синоќа Португалците поведоа по само 5 минути игра откако турскиот судија Халил Умут Мелер досуди крајно контроверзен пенал за играње со рака. Кристијано Роналдо успеашно го реализираше, а потоа во 20. минута на асистенција на Жуау Феликс го дуплираше водството. Пет минути подоцна Бруну Фернандеш зголеми на 0:3, во 32. минута Фернандеш му намести на Жуау Канселу за 0:4, а петардата пукна во 41. минута кога Отавиу го послужи Жуау Феликс.