Француската фудбалска федерација на својата официјална веб-страница го објави продолжувањето на договорот со селекторот на репрезентацијата Дидие Дешан. Важноста на новиот договор е до јуни 2026 година.
„Француската фудбалска федерација и нејзиниот претседател Ноел Ле Грает, со задоволство го објавуваат продолжувањето на Дидје Дешан на чело на француската репрезентација до јуни 2026 година“, објави ФФФ.
Во стручниот штаб ќе продолжат да работат и Ги Стефан како помошник на Дешан, Франк Равјо како тренер на голманите и Сирил Моан како задолжен за физичка подготовка.
Тоа значи дека ќе ја води Франција и на наредните две големи натпреварувања - ЕУРО 2024 во Германија и Мундијалот 2026 во Канада, САД и Мексико.
Дешан е на чело на репрезентацијата од 9 јули 2012 година. За десет години Французите под негово водство станаа светски шампиони во Русија 2018, победници на Лигата на нации за сезоната 2020/2021 и сребрени медалисти на два турнира: ЕУРО 2016 на домашен терен и Светско првенство 2022 во Катар.
На 18 декември Франција загуби од Аргентина (3:3, 2:4 на пенали) во финалето на Светското првенство во Катар. По натпреварот, францускиот претседател Емануел Макрон побара од 54-годишниот специјалист да остане селектор на националниот тим.
Дешан со „Ле Блу“ има скор од 89 победи, 28 нерешени и 22 пораза во 139 натпревари, 279 постигнати голови и 119 примени. Воедно, тој е Светски шампион и како играч во 1998 и европски од 2000 година.
