Ѕвездата на Јувентус Пауло Дибала (26) и неговата девојка Ориана Сабатини се во самоизолација во Торино откако дознаа дека се заразени со коронавирус, а пред два дена ситуацијата станала многу сериозна.
Ориана во разговор со La100 зборуваше за вирусот со кој се заразија и поради кој веќе девет дена се во изолација.
„Добро се чувствуваме, но пред два-три дена ситуацијата беше прилично сериозна. Во изолација сме веќе девет дена и лекарите ни рекоа дека повторно ќе нѐ тестираат на 31 март. Добивме насоки да се одмараме и да пиеме витамини. Чувството е слично како кога си болен од грип. Ве боли цело тело и чувствувате умор. Немав треска, ни висока температура. Но пред неколку дена слушнав чуден звук од белите дробови, а потоа и Пауло почна да се чувствува лошо. Симптомите беа како кај грип“, рече Ориана.
Даниеле Ругани беше првиот играч на Јуве кој се зарази со коронавирус, а по него се заразија уште двајца членови на „Старата дама“ – Матуиди и Дибала.
Италија е најтешко погодена земја од Covid-19 во светот. Досега има повеќе од 74.000 заболени, а починаа 7.500.