Директорот на ИЈЗ, Шабан Мемети се огради од Facebook статусот на Елена Караџовска, ќерка на епидемиологот Жарко Караџовски. Тој соопшти дека Караџовска ќе биде повикана на разговор, пренесе Сител.
И од Министерството за здравство се оградуваат од статусот на Караџовска, но нема одговор дали ќе има санкција.
- Министерството за здравство ја поддржува работата на новинарите и медиумските работници и во нив гледа партнер во борбата со ковид-кризата. Како институција остануваме отворени за навремено, транспарентно и точно информирање на јавноста, како и отворени за соработка со медиумите и медиумските работници. Министерството се оградува од приватните ставови изнесени на приватни профили на социјални мрежи, на вработени во здравствениот сектор, велат од Здравство.
Инаку, Караџовска околу пет години е вработена во ИЈЗ. Нејзината задача е администрирање и менаџирање на сајтот на Институтот.
„Драги безобразни новинари“, вака почнува објавата на Елена Караџовска, преку која се обиде да објасни зошто завчера доцнеше дневната ковид статистика.
Вели дека вработените остануваат ноќе за да бројат и рачно да внесуваат податоци кои подоцна се достапни за медиумите. И според неа, срамота било да се коментира работата на ИЈЗ.
„Моите колеги знаат како е да не се прибереш дома со семејството, бидејќи бројат пријави и внесуваат податоци или работат во лабораторија. За разлика од сите вас шти си излегувате по кафани, слави, шетања и журкања низ државата и слично, некој нема време да живее на раат како вас, во време на корона пандемија, бидејќи работи одговорна работа. Срамота е да се коментира такво нешто, пишува Караџовска. ИЈЗ отсекогаш била институција која споделува податоци во врска со некоја состојба или настан. Вие работите, односно имате тема за статија зашто некој ви дава податоци, инаку ќе си пишувате за дневно-политички настани“, напиша Караџовска.