FIAT порано го нудеше скромното миникомбе Ulysse, кое го напушти пазарот во 2010 година, но сега ова име се врати во модерно издание.
FIAT го претстави својот втор електричен модел по новиот модел 500e - електричното комбе e-Ulysse наменето првенствено за урбаните пазари.
Клиентите имаат избор од две батерии со капацитет од 50 и 75 kWh, додека максималниот опсег е 330 километри. Стандардниот систем за брзо полнење од 100 kW може да ја наполни батеријата до 80 проценти капацитет за 45 минути. FIAT e-Ulysse развива максимални 136 КС и 260 Nm вртежен момент, а максималната брзина му е 130 км/ч.
Од FIAT очекуваат електричното комбе да се користи за такси услуги, за потребите на хотелите и другите компании кои сакаат електричен возен парк за транспорт. Затоа, ова практично возило нуди неколку конфигурации за седум или осум патници.
Во верзијата Lounge со седум седишта, E-Ulysse може да има втор ред седишта свртен кон третиот ред, со маса на преклоп помеѓу. Затоа FIAT оваа верзија ја нарекува „дневна соба на тркала“. Конфигурацијата со осум патници има дополнително седиште во вториот ред.
Италијанската компанија ја нагласува разновидноста на E-Ulysse со тоа што има 12 различни конфигурации за верзијата со осум седишта, а таа бројка се зголемува на 15 во случајот со верзијата со седум седишта. Споменатата маса може да се преклопи во неколку позиции. Средните и задните седишта се поставени на шини и може лесно да се позиционираат и извадат.
FIAT E-Ulysse е опремен со системи за помош на возачот и безбедносни системи, има автоматски систем за итно сопирање, систем за предупредување за излегување од лента, систем за следење на мртвите точки, систем за препознавање сообраќајни знаци и слично. Не е познато дали овие системи се стандардни или опционални.
Најдобро опремените модели имаат 7-инчен екран на допир, панорамски покрив, седишта обложени со кожа, xenon фарови, електронска задна врата и пренослив прочистувач на воздух.
Комбето на европскиот пазар ќе пристигне во мај, а цената сè уште не е позната.
