Иако бројката на заразени од коронавирусот во Русија се зголемува, градоначалникот на Москва реши да го подготви градот за прослава по повод Нова година и Божик, со одредени мерки.
Ако останатите европски земји воведуваат карантини, полициски часови или работа на угостителите до одредено време, во Москва се планираниат прослави.
Сергеј Собјанин најави дека нови мерки ќе стапат во сила, но тие нема да им го одземат празничниот дух на жителите на руската престолнина бидејќи подразбираат одржување на градски прослави и новогодишни базари, само со намален капацитет.
„Со COVID-19 ќе се бориме уште долго време, но најтешкиот период би требало да заврши за некој месец. Најтешката одлука за политичките лидери не беше тоа кога да се затворат јавните објекти, туку кога повторно да се отворат. Да се укинат мерките значи дека ризикувате масовна зараза“, рече градоначалникот.
Но, Москва нема да биде воопшто без мерки. Забранети се масовни собири, а укинати се и препознатливите огромни новогодишни базари, кои, сепак, ќе бидат заменети со помали кои веќе се поставени во поголем број на повеќе локации ширум градот. Баровите, рестораните и кафулињата ќе можат да работат за време на целиот овој празничен период и тоа без рестрикции на времето, освен за новогодишната ноќ кога ќе мора да затворат во 23 часот. За влез во одредени установи на граѓаните ќе им биде потребен негативен тест не постар од три дена.
„За прв пат имаме многу поголем број на новогодишни базари во централниот дел на градот. На овој начин многу повеќе граѓани можат да си купат природна новогодишна елка“, вели Алексеј Немерјук, главен на градската управа за трговија и услуги.
Очекувано, Москва е епицентар на заразата во Русија, а таму веќе речиси 10 илјади луѓе се вакцинираа со домашната Спутник V вакцина.