На азиските берзи цените на акциите благо пораснаа, благодарение на добрите економски показатели, но тргувањето се одвива претпазливо бидејќи поради високата инфлација се очекува зголемување на каматните стапки од регионалните централни банки. Индексот MSCI на азиско-пацифичките акции, без јапонските акции, порасна за 0,3 отсто околу 19 часот.
Утрово на токиската берза индексот Nikkei порасна за 0,6 отсто, додека цените на акциите во Австралија, Хонгконг и Јужна Кореја пораснаа меѓу 0,3 и 1,2 отсто. Во Шангај, пак, тие се лизнаа за 0,2 отсто. Азиските инвеститори беа охрабрени од податоците кои укажуваат на забрзување на растот на најголемите регионални економии, по укинувањето на строгите рестриктивни мерки поврзани со COVID-19.
Имено, утринава беше објавено дека активноста во кинескиот услужен сектор во јуни достигна највисоко ниво за речиси една година, додека во Јапонија, истиот месец, активноста во услужниот сектор најмногу порасна за повеќе од осум години.
Доброто расположение на пазарите е и благодарение на веста дека американскиот претседател Џо Бајден може да ги намали царините за увоз на некои кинески производи за да ја заузда инфлацијата. Сепак, на пазарите нема еуфорија бидејќи инфлацијата продолжува да расте во земјите од регионот, па се очекува зголемување на каматите од централните банки.
Ова се главните причини зошто индексот MSCI на азиско-пацифичките акции загуби околу 16 отсто од почетокот на годината. Така, се очекува дека денеска австралиската централна банка ќе ги зголеми клучните каматни стапки за 0,50 процентни поени.
Јужнокорејската централна банка би можела да го стори истото овој месец, бидејќи утринава беше објавено дека инфлацијата во таа земја во јуни достигна 6 отсто на годишна основа, што е највисока од финансиската криза. Пазарите се поддржани од благиот раст на американските фјучерси индекси, кои попладнево најавуваат раст на цените на акциите на Волстрит, додека вчера во САД немаше работа поради празникот.
А на девизниот пазар вредноста на доларот во однос на кошничката на валути благо порасна. Индексот на доларот кој ја покажува вредноста на американскиот долар во однос на другите шест најважни светски валути се движи околу 105,19 поени, додека вчера во ова време изнесуваше 105,08 поени.
Истовремено, курсот на доларот во однос на јапонската валута порасна од вчерашните 135,05 на 136,20 јени. Сепак, американската валута ослабе во однос на европската, па цената на еврото достигна 1,0435 долари, додека вчера во овој момент беше 1,0430 долари. Цените на нафтата, пак, пораснаа втор ден по ред. Цената на барелот на лондонскиот пазар зајакна за 0,23 отсто, на 113,75 долари, додека на американскиот пазар цената на барелот порасна за 1,94 отсто, на 110,53 долари.
