Кошаркарот на Далас Маверикс и словенечки репрезентативец, Лука Дончиќ, демантираше дека по крајот на сезоната ќе го напушти клубот, пренесуваат американските медиуми.
Одредени медиуми објавија дека Дончиќ бил незадоволен од политиката на клубот и се заканувал дека ќе го напушти Далас доколку управата не ангажира засилувања до стартот на новата сезона. Далас остана без плеј-оф и плеј-ин, бидејќи регуларниот дел од сезоната во НБА го заврши на 11-тото место во поредокот на Западната конференција со 38 победи и 44 порази.
Челниците на Далас решија да се откажат од борбата за плеј-ин на два натпревара пред крајот на регуларниот дел од сезоната за да го задржат својот избор на претстојниот НБА драфт.
„Се договоривме, но не ми се допадна. Не реков дека сакам да го напуштам Далас, тоа некаде го прочитав. Некој рекол дека сакам да заминам, а тоа не бев јас. Среќен сум во Далас, има причина за да се грижите“, рече Дончиќ.
Словенечкиот кошаркар истакна дека очекува промени во екипата на Далас со што тимот од Тексас следната сезона ќе биде конкурентен за титулата.
„Нешто мора да се промени, тоа е сигурно. Минатата сезона стигнавме до финалето на Западната конференција, тогаш бев воодушевен од атмосферата во тимот“, додаде Дончиќ.
Сезонава словенечкиот претставник имаше просек од 32,4 поени и имаше 8,6 скока и 8 асистенции по натпревар.