Турски суд осуди на доживотен затвор некои од 500-те осомничени за обид за државен удар во 2016 година против претседателот Реџеп Таjип Ердоган, пренесува агенцијата Анадолија.
Исламскиот верски водач Феjтулах Ѓулен е прогласен за „мозокот на пучот“ против Ердоган, а неговото движење Анкара го прогласи за терористичка група, иако тие тоа силно го негираат.
Вкупно 250 лица загинаа, а повеќе од 2.000 беа повредени во обидот за државен удар, што се смета за пресвртница во владеењето на Ердоган и турската современа политика. Судскиот процес се однесува на настаните во воздухопловната база Акинка во близина на Анкара.
Тогашниот началник на Генералштабот Хулуси Акар - сегашен министер за одбрана - и други високи воени функционери беа заложници во базата една ноќ пред неговото ослободување на 16 јули.
Во судењето, кое започна во август 2017 година, учествуваа 475 пилоти и други осомничени обвинети за убиство, обид за кршење на уставниот поредок и обид за убиство на Ердоган. Доколку бидат осудени, тие ќе го поминат остатокот од својот живот во затвор.
Обвинителството ги обвинува за подготвување државен удар во базата и за наредба на воените авиони да ги бомбардираат државните згради. Зградата на Парламентот беше погодена трипати, како и патот близу претседателската палата, седиштето на специјалните сили и полицијата во Анкара.
Во времето на пучот, Ердоган беше на одмор во јужна Турција.
Во бомбардирањето загинаа 68 лица, а над 200 беа повредени. Девет цивили беа убиени во обид да ги спречат заговорниците да влезат во базата.
