По четиримесечно одложување поради штрајковите во Холивуд, американските ѕвезди се собраа синоќа во Лос Анџелес на 75-тото доделување на наградите Еми.
Драмската серија Succession е прогласена за најдобра на наградите Еми во Лос Анџелес, со триумф на актерите, а The Bear ја доби наградата за најдобра хумористична серија.
Телевизискиот еквивалент на Оскарите обично се одржува во септември, но организаторите одлучија наместо тоа да го одржат во јануари бидејќи веруваа дека дотогаш штрајковите на актерите и сценаристите ќе завршат и најголемите ѕвезди ќе можат повторно да се појават на црвениот тепих.
Succession, мрачна и остра хроника на внатрешните расправии на богато дисфункционално семејство на чело на голема медиумска империја, имаше 27 номинации, а заврши со вкупно шест Еми награди, колку што доби The Bear. Succession заврши минатата година по четири сезони.
Серијата Succession ги освои и наградите за најдобар главен актер и актерка во драмска серија, тие ги добија Киеран Калкин и Сара Снук. А наградата за најдобра машка споредна улога ја доби британскиот актер Метју Мекфадиен за улогата во Succession.
Еми за најдобра споредна женска улога и припадна на Џенифер Кулиџ за сатирата The White Lotus. Додека Succession доминираше во категориите драма, The Bear освои шест награди во категоријата комедија, а Beef на Netflix доминираше во категоријата кратки серии.
The Bear - освен што ја освои наградата за најдобра хумористична серија - доби и три актерски награди: Џереми Ален Вајт доби Еми за најдобар главен актер, а Ајо Едебири и Ебон Мос-Бахрач за најдобра споредна женска улога и најдобар спореден актер.
Најдобра актерка во хумористична серија е Квинта Брансон (Abbott Elementary). Сер Елтон Џон ја доби својата прва Еми награда, со што стана EGOT - добитник на награди Еми, Греми, Оскар и Тони.
Списокот на сите наградени можете да го погледнете на овој линк.
