Тимот на Македонското еколошко друштво (МЕД) минатата ноќ лоцираше нова рисица, во кафез-замката која беше направена минатата недела, а поставена пред само три дена.
„Среќна вест! Тимот на МЕД минатата ноќ лоцираше нова рисица, и тоа во кафез-замката која беше направена минатата недела, а поставена пред само три дена. Рисицата Луна пред само неколку часа беше лоцирана на планината Буковиќ, во близина на Стража. Тешка е 16 килограми и е во одлична здравствена состојба. Откако беа направени потребните прегледи и ѝ беше поставен околувратник преку кој ќе го следиме нејзиното движење, таа беше пуштена на слобода“, велат од МЕД.
„Како дел од нашите редовни активности, нашиот тим заедно со тројца волонтери направи кафез-замка, која оваа среда беше поставена на планината Буковиќ, близу Стража. Половина час по полноќ, добивме аларм дека во кафез-замката има рис, и веднаш се упативме на терен. Стигнавме на локацијата околу 3 часот по полноќ и започнавме со редовната процедура при заловување на нов рис. Овој пат, среќни сме што рисот е женка, и е во одлична состојба. Тежи 18 килограми. Ја крстивме Луна, бидејќи ја најдовме на полна месечина“, вели Искра Манојлоска за Макфакс, координатор за комуникации во Македонско еколошко друштво.
Балканскиот рис е национален симбол на Македонија и се наоѓа на монетата од 5 денари. Рисот се смета за најголема мачка на континентот Европа. Балканскиот рис бил на работ на истребување. Се проценува дека има околу 100 единки останато. Започнува да се пари во јануари до февруари, амалите се раѓаат во април.