Американскиот пратеник за Западен Балкан, Габриел Ескобар, денеска изјави дека Косово мора да ги исполни барањата на западните земји во однос на регистерските таблички и формирањето на Заедницата на српските општини, пренесе Бета.
Ескобар за програмата на Гласот на Америка на албански јазик изјави дека повлекувањето на Србите од косовските институции е „бескорисно“, но и дека тоа создало „прилично опасна“ ситуација на северот на Косово.
„Бевме многу јасни и отворени за тоа што очекуваме од двете страни. Побаравме од Косово период од една година да спроведе кампања за информирање на јавноста и да ја подготви ранливата заедница да биде подготвена да ги смени регистарските таблички на автомобилите“, рече Ескобар.
Тој ги повика косовските власти да го стават на дневен ред прашањето за ЗСО.
„Од наша гледна точка и гледна точка на партнерите на Квинтата, тоа е барање и ние ќе останеме цврсти“, рече Ескобар.
Говорејќи за српската страна, американскиот функционер рече дека секој протест треба да биде мирен.
„Повлекувањето на Србите од косовските институции не е корисно. Ги повикувам партиите да бидат подготвени веднаш да ги исполнат овие прашања“, додаде Ескобар.
