Оваа африканска земја троши милијарди долари годишно за увоз на гориво, а истовремено произведува 100% од својата електрична енергија од обновливи извори.
Втората најнаселена африканска земја и една од најбрзо растечките економии во светот - Етиопија, донесе одлука да го забрани увозот на сите возила со мотори со внатрешно согорување, и нови и користени, односно од бензинци и дизелаши да се преориентира исклучиво на електрични автомобили.
Затоа од Адис Абеба велат дека како прва земја во светот што се одлучила на ваков потег заслужуваат признание на глобално ниво.
Министерот за транспорт Алему Симе, кој ја објави владината одлука минатата недела, нагласува дека е забранета продажбата на сите возила на фосилни горива и посочува дека „Етиопија не произведува фосилни горива, туку ги увезува од странство и за тоа троши значителни средства во странски валути“.
Министерот нагласува дека во Етиопија се произведува струја во големи количини, дека струјата ја има во изобилство, а нејзината цена е многу пониска во споредба со горивото. Според податоците за минатата година, оваа источноафриканска земја потрошила околу 6 милијарди долари за увоз на гориво.
Иако инфраструктурата за полнење електрични возила во моментов е ограничена, според Меѓународната агенција за енергија, Етиопија произведува 100% од својата електрична енергија од обновливи извори, благодарение на силниот развој на сончевата, потоа хидро и ветерната енергија.
Со тврдењето дека електричните возила „масовно се произведуваат во светот“ и дека е можно „да им се обезбеди инфраструктура за полнење во Етиопија“, министерот нагласува дека земјата забрзано работи на изградба на станици за полнење на електрични возила.
„Етиопија е поддржувач на зелениот развој и е земја која напорно работи на тоа. А за да се намали загадувањето на воздухот, се претпочита електричен автомобил отколку автомобил на бензин“, заклучи Симе.
И покрај тоа што сè уште не се објавени деталите за забраната за увоз на возила на бензин и дизел, в очи паѓа фактот што Етиопија, а не некоја поразвиена земја, пионер во примената на електрични возила, како што е Норвешка, ќе стане прва која во целост се префрлила на имплементација на политиката на нулта емисија на издувни гасови од возилата.