Европскиот парламент денеска усвои резолуција со која Русија ја прогласува за држава спонзор на тероризмот поради војната против Украина и уништувањето на цивилната инфраструктура во земјата.
Европратениците усвоија резолуција во која посочија дека намерните напади и злосторства извршени од руските сили и нивните агенти врз цивилите во Украина, уништувањето на цивилната инфраструктура и другите сериозни прекршувања на меѓународното и хуманитарното право, претставуваат терористички акт и воени злосторства. Во овој контекст, Русија се смета за држава која го спонзорира тероризмот и држава која „користи средства за тероризам“, соопшти Европскиот парламент.
Во резолуцијата се истакнува дека Русија е одговорна за убиствата на многу цивили во Украина и другите војни во кои учествувала, во Чеченија и Сирија, како и за убиствата на политичките противници во земјата и во странство.
Со оглед на тоа што ЕУ во моментов не може официјално да прогласува држави за спонзори на тероризмот, Собранието бара да се донесе соодветна правна рамка. Тоа, исто така, предлага Советот потоа да ја разгледа можноста за додавање на Русија на таквата листа на ЕУ на држави кои го спонзорираат тероризмот. Ова би предизвикало силни рестриктивни мерки против Москва и би имало значителни рестриктивни последици за односите на ЕУ со Русија.
Во меѓувреме, пратениците го повикуваат Советот да ги вклучи руската група Вагнер и 141-та специјална моторизирана единица, позната како „Кадировци“, како и други вооружени групи, паравоени единици и посредници финансирани од Русија на терористичката листа на ЕУ.
Парламентот бара Европската Унија дополнително да ја изолира Русија на меѓународен план, што се однесува и на нејзиното членство во меѓународните организации и тела како што е Советот за безбедност на Обединетите нации. Претставниците бараат и намалување на дипломатските односи со Русија и минимизирање на контактите на ЕУ со нејзините официјални претставници. Тие посочуваат дека земјите-членки на ЕУ треба да ги затворат и забранат институциите поврзани со руската држава, кои ја промовираат пропагандата на официјална Москва низ светот.
Резолуцијата ги повикува земјите-членки на ЕУ во Советот да ја земат предвид ескалацијата на терористичките акти од страна на Русија против украинските цивили и брзо да ја завршат работата на деветтиот пакет санкции против Москва. Пратениците, исто така, бараат од членките на ЕУ активно да го спречат, истражуваат и гонат секое заобиколување на сегашните санкции и заедно со Комисијата да ги разгледаат можните мерки против земјите кои се обидуваат да и помогнат на Русија да ги избегне наметнатите рестриктивни мерки.
Резолуцијата на Литванецот Андриус Кубилиус беше прифатена со 494 гласови за, 58 против и 44 воздржани.
Претходно парламентите на Литванија, Латвија, Естонија, Полска и долниот дом на чешкиот парламент во резолуции ја прогласија Русија за државен спонзор на тероризмот.
Жељана Зовко, претставник на ХДЗ и потпретседател на Комитетот за надворешни работи на Европскиот парламент, изјави за Хина дека оваа резолуција испраќа „силна морална порака“ до Русија.
„Сите резолуции што ги усвоивме беа патоказ за политиките што Европската Унија ги усвои подоцна. На тоа не би гледала како на нешто што нема тежина, туку како на многу сериозна порака“, додава Зовко.