Министрите за здравство на земјите членки на Европската Унија на вчерашната средба во Луксембург усвоија препорака која има за цел да поттикне помала потрошувачка на антимикробни лекови и да ја намали потрошувачката на антибиотици за 20 отсто до 2030 година.
„Не можеме да ги игнорираме смртоносните закани што микроорганизмите отпорни на лекови ги претставуваат по здравјето на луѓето. Борбата против антимикробната резистенција беше клучен приоритет на шведското претседателство, а денешната препорака им дава на земјите од ЕУ алатки за следење и намалување на потрошувачката на антимикробни средства“, рече Јакоб Форсмед, шведскиот министер за социјални работи и јавно здравје.
Здравјето е ексклузивна надлежност на земјите-членки, затоа Советот на ЕУ не може да издава обврзувачки регулативи, туку препораки кои земјите-членки можат да ги спроведуваат на доброволна основа.
Препораката е фокусирана на превенција и контрола на инфекции, надзор и мониторинг, иновации и достапност на ефективни антимикробни средства, претпазлива употреба и соработка меѓу земјите-членки и на глобално ниво.
Во соработка со Европскиот центар за превенција и контрола на болести (ECDC), препораката поставува неколку цели на ЕУ кои треба да се исполнат до 2030 година.
Станува збор за намалување од 20 отсто во вкупната употреба на антибиотици кај луѓето, ефикасна употреба на антибиотици, така што најмалку 65 отсто од вкупната употреба на антибиотици е ефективно и намалување на инфекциите со три клучни бактерии отпорни на антибиотици, најмногу во болниците.
Антимикробните средства се лекови од критична важност. Меѓутоа, поради нивната прекумерна и неправилна употреба со текот на годините, антимикробната резистенција е зголемена, што значи дека антимикробните средства ја губат својата ефикасност. Затоа е сè потешко или невозможно да се лекуваат инфекциите.
