Министрите за надворешни работи на ЕУ се согласија да ги заострат санкциите кон Русија и да ги зголемат испораките на оружје за Киев, откако рускиот претседател Владимир Путин нареди мобилизација на стотици илјади Руси за војната во Украина.
Министрите за надворешни работи кои се во Њујорк на состанокот на светските лидери во Обединетите нации одржаа вонреден состанок доцна во средата во врска со украинската криза.
Шефот за надворешна политика на ЕУ, Жозеп Борел, изјави дека најавата на Путин за анексија на делови од украинската територија и заканата од нуклеарно оружје покажуваат „паника и очај“.
„Јасно е дека Путин се обидува да ја уништи Украина“, изјави Борел за новинарите по состанокот на министрите на ЕУ.
Откако беа информирани од украинскиот министер за надворешни работи Дмитри Кулеба, министрите се согласија да подготват осми пакет санкции што ќе ги таргетира „порелевантните сектори на руската економија и ќе продолжи да ги таргетира луѓето одговорни за војната за агресија во Украина“, рече Борел.
Министрите на ЕУ ќе го одржат својот следен официјален состанок во средината на октомври кога се очекува да биде формализиран пакетот санкции.
Министрите се согласија и да ја зголемат испораката на оружје за Украина. Борел одби да даде дополнителни детали за видот на санкциите или воената поддршка, но рече дека верува оти ќе има „едногласна“ поддршка за новите мерки во Унијата.
Естонскиот министер за надворешни работи Урмас Реинсалу во интервју за Ројтерс изјави дека Путин се обидува да го исплаши и подели Западот, но и дека неговите последни изјави се „пресвртница“.
Состанокот во средата беше одржан за да се нагласи единството, брзо да се придвижи новиот пакет санкции и да се финансира европската мировна помош за зајакнување на снабдувањето со оружје на Украина, рече тој.
Зачувувањето на единството меѓу 27-те земји-членки за пакетот санкции може да се покаже сложено во услови на криза во снабдувањето со енергија што силно ја погоди Унијата.
